متعلمتش

متعلمتش

رغم الحزن السايل أنهار
من شراييني
رغم انك يا حبيبتي
قطعت النور عن قلبي وعيني
ورغم انك بالليل في الضلمة
فتحتي الباب للهم يجيني
اول ما رفعتي السماعة
قلبي اتنطط
زي عيال خارجين في العيد
قلت يا قلبي اسكت يا عبيط
متعلمتش ؟؟
رد القلب ..الميت فيكي
متعلمتش
مهما تقول وتعيد وتزيد
انا متشعلق في السماعة
بسمع أغنية مواعيد
هي الشمس عليا حتطلع
وانا متغرب عن احضانها
وعن لياليها
هو العصفور لما بيبرد
لية غير عشة ؟؟
وعشي عنيها
متعلمتش يا سي محمود
حفضل جوة الحلم الاخضر
بحلم بيها
عارفة يا حبي مين البنت الحلوة الدافية
اللى القلب بيبكي عليها
واللى حياتي الغالية رخيصة
قدام ضحكة في شط عنيها
عارفة يا ست الناس والعصر ؟؟
انت يامصر